Cargo ship ng NoKor, kinumpiska ng U.S.

KINUMPISKA ng United States ang barko ng North Korea na ginagamit sa pagbebenta ng coal dahil sa umano’y paglabag sa international sanctions.

Ayon sa Justice Department officials, papalapit umano sa territorial waters ng US ang Wise Honest Cargo Ship.

Ang naturang cargo ship ay isa sa pinakamalaki sa North Korea at ayon sa US, ginagamit ito upang iligal na magbenta ng coal at nagdadala umano ito ng heavy machinery sa Pyongyang.

Nagpasa ng resolusyon ang U.N. Security Council noong 2017 na nagbabawal sa North Korea na mag-export ng coal.

Ang anunsiyo ng US ay ilang oras lamang matapos muling magpalipad ng short-range missiles ang Pyongyang.

Ang pagpapalipad ng missiles ay ikalawa na ngayong linggo sa kalagitnaan ng ‘deadlock’ sa nagaganap na negosasyon sa US para sa denuclearization ng Korean Peninsula.