Babaeng nahihirapang mag-adjust dahil sa kasalukuyang sitwasyon ng love life
Dear Roma,
Ako si Joan, 29 years old, may isang anak at hiwalay sa asawa. May bf akong hiwalay din sa asawa at may isa ring anak. Sa kasamaang-palad, mag-iisang buwan na kaming hiwalay dahil nalaman kong binilhan niya ng cellphone ang ex niya, ‘yung nanay nu’ng bata. Hiniwalayan ko siya dahil nasasaktan ako. Bakit kailangan pa niyang makipag-usap at bilhan ng regalo ang ex niya? Sa totoo lang, high school pa lang kami, mahal ko na siya. After 10 years, nalaman kong nag-asawa na siya, kaya nag-asawa rin ako, pero siya pa rin ang palaging laman ng puso ko. Nu’ng nalaman kong naghiwalay na sila ng asawa niya ay kahihiwalay lang din namin ng ex ko. Sa sobrang pagmamahal ko sa kanya, minahal ko na rin ang anak niya, binibilhan ko ng mga gusto, ipinapasyal ko at ako palagi ang nag-e-effort sa relasyon namin. Ang gusto ko lang naman ay alisin niya sa buhay niya ‘yung ex niya kasi ako, wala na kaming ugnayan ng ex ko. — Joan
Joan,
Una sa lahat, kapag nagmahal ka, dapat selfless. Hindi mo maiaalis sa kanya na magkaroon ng ugnayan sa nanay ng anak niya. Nanay ‘yun nu’ng bata, eh, natural lang na hindi niya ipagdamot du’n ang anak nila. Ano naman kung binilhan niya ng cellphone? Anong malay mo baka ginawa lang niya ‘yun para magkausap ang mag-ina kahit man lang sa cellphone? Kahit ano pang gawin mo, parte na ‘yun ng history ng buhay niya. Siyempre, ama siya, eh, alam niya sa sarili niyang kailangan ng anak niya ang tunay na nanay niya. Alam mo, nandiyan ka hindi para saktan ang bata o ipagkait sa bata ang pagmamahal na deserve niya, nandiyan ka para tumayong ikalawang ina. Dapat nga pakisamahan mo rin ang ex niya at patunayan mong kaya mong maging ina sa anak ng BF mo. Nagmahal ka ng may anak, eh, ganu’n talaga. Magkaiba ang istorya ninyo, ‘yung ex mo, ayaw magpakaresponsableng ama, pero siya dahil gusto niya, siya mismo ang nagsisikap para magkaroon ng mabuting ugnayan ang anak niya at ang tunay nitong ina. Gets mo? God bless!
Comments