LAST MAN STANDING SI DE LUNA SA US 9-BALL

NAOBLIGANG mag-empake ang mga premya­dong cue artists ng Pilipinas tulad nina Carlo “Black Tiger” Biado, Dennis “Ro­bocop” Orcullo, Roberto “Su­perman” Gomez, Jo­hann “Bad Koi” Gonzales Chua, Warren “The War­rior” Kiamco at Francisco “Django” Bustamante ma­tapos makatikim ng tigda-dalawang pagkatalo kaya naiwang nakasampa sa balikat ni Jeff “The Bull” De Luna ang pag-asa ng bansa sa prestihiyosong 2019 US 9-Ball Open Championship na pumasok na sa homestretch sa Man­dalay Bay Resort and Casi­no ng Las Vegas, Nevada.

Swak sa quarterfinals si De Luna matapos talunin si Imran Majid ng England sa iskor na 11-9. Nakapasok na rin ang Fil-Canadian na si Alex “The Lion” Pagulayan sa final 8 dahil sa pangingi­babaw niya laban kay Singa­porean Aloysius Yapp, 11-10.

Nauna rito, nakahak­bang sa huling 16 si Jeffrey Ignacio at De Luna mata­pos na malimas ang mga bi­tuin ng Philippine billiards.

Sumandal si Ignacio Sa mga panalo laban kina Den­nis Hatch (11-5) ng USA, kababayang si Zoren James Aranas (11-8), Taiwanese Yang Ching-shun (11-4), Nicolas Charette (11-7) mula sa Canada, ang Ale­mang si Marco Spitzky (11-9) at ang Griyegong si Kos­tas Koukiadakis (11-4) para mapabilang sa final 16 ng mga bilyaristang may tsansa pa sa malaking parte ng $300,000 winners’ purse. Ang tanging pagkatalo niya ay nasaksihan sa isang kina­tawan ng Taiwan (Hsu Kai Lin; 8-11).

Halos ganito ring pag­lalakbay ang ginawa ni De Luna kaya mula sa 256 na mga manunumbok na luma­hok ay isa na lang siya sa mga manunumbok na ma­ka­kasargo sa 16-year, single elimination, final stage ng malupit na sagupaan.

Ka­sama sa mga nahu­gutan niya ng mga panalo ay sina Liu Haitao (China, 11-5), Keni­chi Uchigaki (Japan, 11-3), kapwa Pinoy na si Orcullo (11-10), Angelo Salzano (Italy, 11-3) at Chris Ro­binson (U.S.A, 11-9).