WARRIORS, BLAZERS, AT RAPTORS, 3-1

HUMALIBAS si Kevin Durant ng 33 puntos upang muling biguin ng dumayong Golden State Warriors ang Los Angeles Clippers, 113-105, sa Game 4 ng Western Conference first-round series playoffs kahapon.

Makaraang magwagi sa parehong laro sa Los Angeles, hawak na ng Warriors ang 3-1 series lead at naghihintay ang Game 5 sa Miyerkules sa Oakland, California. Bumasket si Klay Thompson ng 27 sa kanyang 32 puntos sa first half para sa Warriors.

Nakagawa si Stephen Curry ng 3-for-14, kabilang na ang 1-for-9 mula sa 3-point range, nakatapos ng 12 puntos, 10 rebounds at 7 assists.

Umiskor si Shai Gil­geous-Alexander ng season-high 25 puntos para sa Clippers. Nakapagtarak si Danilo Gallinari ng 16 matapos maging scoreless sa first quarter. Si Patrick Beverley ay may 12 puntos at team-high 10 rebounds habang si Lou Williams ay dumale ng 12 para sa Los Angeles.

Samantala, sa iba pang laban, may 3-1 series lead na rin ang Portland Trail Blazers makaraan ang road win kontra Oklahoma City Thunder. Umiskor si C.J. McCol­lum ng 27 points at si Damian Lillard ay may 24 nang manaig ang Blazers sa Thunder, 111-98.

Namumuno na sa 3-1 ang Blazers sa Western Conference playoff series at may tsansa na rin ang Portland na tapusin ang serye sa sariling balwarte. Ang panalo ang pumutol sa ‘eight-game road playoff losing streak’ ng Blazers at binigyan ang road teams ng 8-0 record nitong weekend sa NBA playoffs. Sa ikalawang sunod na laro, isang big third quarter game ang ginawa ni Lillard.

Samantala sa iba pang laro, bumanat si Kawhi Leonard ng 34 points, 12 sa 3rd quarter, nang gapiin ng bisitang Toronto Raptors ang Orlando Magic, 107-85, para sa 3-1 lead sa first-round playoff series.

Puwede na ring isara ng Raptors ang best-of-seven series bukas kung magwa­wagi sa Game 4 sa Toronto. Nag-ambag si Pascal Siakam ng 16 points para sa Toronto habang si Norman Powell ay may 16, may 13 si Serge Ibaka at 8 rebounds. Siyam na puntos ang naiambag ni Kyle Lowry at 9 assists. Bumakas si Aaron Gordon ng 25 points at 7 rebounds para sa Magic. May 19 puntos si Evan Fournier at 11 kay Nikola Vucevic. (MC/ATD)