Malinaw ayon sa birthday... BABAENG NAKATAKDANG SUWERTEHIN SA PAKIKIPAGRELASYON

Maestro Honorio Ong

Dear Maestro,

Isinilang ako noong February 4, 1993. Ma­raming beses na akong nabigo sa pag-ibig, kaya naisipan kong sumangguni sa inyo dahil ayaw ko ng ma­bigo pang muli.

Gusto kong mala­man kung sa edad kong 26 na may anak sa pag­kadalaga, ma­ka­tatagpo pa kaya ako ng lalaking totoo sa akin, iibigin ako ng tapat at pakakasalan?

‘Yung lalaking bu­kod sa mamahalin ako ay mamahalin din ang aking anak at ituturing na parang tunay ni­yang anak?

Sana, bigyan ninyo ako ng pag-asa, min­san kasi, parang na­wa­walan na ako ng pag-asa at sarili ko ang sinisisi ko kung bakit ako nag­kaga­nito.

Umaasa,

Ms. Lonely ng Cabuco, Trece Martires, Cavite

Dear Ms. Lonely,

Huwag kang mawa­lan ng pag-asa dahil bukod sa may hitsura o maganda ka naman, kapansin-pansing okay sa alright din ang iyong pirma.

Ang lagda mong nagtapos sa paitaas na stroke, sa halip, na pai­baba ang nagsasabing, sa edad mong 26 pataas, kahit na dalagang-ina ka pa, muli kang makata­tagpo ng lalaking tapat at magmamahal sa iyo ng panghabambuhay.

Oo, susuwertehin ka sa pag-ibig at pakiki­pagrelasyon na madali na­mang kinumpirma ng destiny number mong 1 (2+4+1993=1999/ 19+99=118/ 11+8=19/ 1+9=10/ 1+0=1) kung saan ang mga taong may destiny number na 1 ay likas na nagkakaroon ng hindi inaasahang su­werte, hindi lang sa pag-ibig kundi sa lahat ng aspeto ng buhay.

Kung saan ayon sa iyong Love Calendar, ang pagdating ng nasa­bing lalaki na habambu­hay na sa iyong magma­mahal kahit na dalagang-ina ka ay nakatakda mo ng makikilala sa pagla­lak­bay.

Ang pagdating ng nasabing lalaki ay ma­gaganap ngayong 2019, sa edad mong 26 pataas, sa buwan ng Disyembre o kaya ay Enero sa su­sunod na taon at pinaka­matagal na sa buwan ng Mayo sa 2020, sa edad mong 27 pataas, sa unang pagtatagpo ninyo, ikaw ay nakasuot ng di­law at puti naman ang nasabing lalaki na ma­giging kaibigan mo hanggang sa maging boyfriend at sa bandang huli ay tuluyan at pang­habambuhay ka na ni­yang mamahalin, kahit na may anak ka pa sa pagkadalaga upang min­san pa, mabuo ang ma­ligayang pagpapamilya.