Sobra-sobrang chlorine sa swimming pool, delikado!

BIGLANG pagkahilo, pagsusuka at hirap huminga.

Ito ang naranasan ng nasa 14 katao na karamihan ay mga menor-de-edad, habang lumalangoy sa isang resort sa Bulacan.

Ang sinasabing dahilan ay ang nalanghap na sobra-sobrang chlorine na inilagay sa swimming pool.

Sa pahayag ng mga awtoridad, sampu sa mga pasyente ang agad ding nakalabas ng pagamutan habang ang apat ay ginagamot pa rin.

Kaya ang paalala sa namamahala ng mga resort, maging maingat at laging tiyakin ang kaligtasan ng lahat.

Isipin natin, marami sa kanila ang bumibiyahe pa mula sa malayong lugar para lang mag-enjoy at makapag-relax kaya dapat lang na ibigay din sa kanila ang karapat-dapat na serbisyo at higit sa lahat ang makauwi nang ligtas.

Hindi rin nawawala ang mga ulat ng pagkalunod at ang reklamo ng kakapusan sa lifeguard sa ilang resort.

Kung sapat ang bilang at kakayahan ng mga bantay, malaki ang pagkakataon na maiwasan o maisalba ang mga nalulunod.

Kaya tama lang ang utos ng gobyerno na ipasara ang mga resort o hotel na walang first aid staff at emergency facilities.