LADY BULLDOGS, TINIBAG ANG UP SA WOMEN’S VOLLEY

PORMAL na pinatalsik ng National University ang University of the Philippines sa Final Four race matapos pataubin ang huli, 25-21, 26-24, 17-25, 23-25, 17-15 kahapon sa UAAP Season 81 Women’s Volleyball Tournament sa MOA Arena sa Pasay City.

Isinalba ng mga krusyal na hits nina rookie Princess Robles at Audrey Paran ang Lady Bulldogs sa decider frame.

Binigyan ni Bingle Landicho ng 11-8 na bentahe ang Lady Bulldogs sa fifth set mula sa service box bago nakatabla ang Lady Maroons matapos ang tatlong sunod na puntos.

Muling ibinalik ni Robles ang lamang sa kanilang panig, 13-11, matapos ang dalawang sunod na attacks bago ipinatas ulit nina Tots Carlos at Jessma Ramos ang laro para sa Lady Maroons.

Kinabig ulit ng kill ni Robles ang lamang ngunit nag-attack error si Paran na sinundan ni Carlos ng cross court kill upang sila naman ang mauna sa match point.

Ngunit kasunod nito ay nag-error ang UP at tuluyan ng sinelyuhan ni Paran ang panalo. Tumapos si Robles na may 20 puntos kasunod si Paran na may 15 puntos.

Sinuportahan naman sila ni Jennifer Nierva sa kanilang floor defense sa itinala nitong 30 digs at 27 excellent receptions. Namuno naman si Carlos para sa UP sa iniskor nitong 18 puntos. (VA)