Kandidatong madaling lapitan, mahirap hanapin, ‘wag iboto!

HINDI pa rin maiwasan ang ‘madugong halalan’. May napapatay pa ring kandidato at nadadamay na tagasuporta.

Pilit na dinidiktahan ang eleksiyong ipinaiiral sana ay demokrasya. May pinapatay na sangkot sa iligal na gawain, mayroon ding gusto lang sanang makapaglingkod nang tapat.

Patunay na hindi lang pera ang puhunan kundi pati buhay.

‘Ika nga nila, kung papasok sa mundo ng politika, handa ka ring mamatay. Hindi mo kilala kung sino ang kakampi mo o kaaway. Minsan, kahit anong buti mo, bukod sa mayroon pa ring masasabi laban sa‘yo, pilit ka ring pababagsakin.

Ito ang katotohanan sa politika na kung sino ang karapat-dapat, sila pa ang hindi nabibigyan ng pagkakataon.

Gayunman, huwag tayong mawalan ng pag-asa. Hindi man maging perpekto ang mga nagpapalakad sa ating gobyerno, mabawasan man lang ang mga pasaway.

Marami na ang mulat sa katotohanan.

Hindi na uubra ang mga mapagpanggap. Silang mga madaling lapitan, pero mahirap hanapin. Nang nangangampanya pa, lahat ng lamay pinupuntahan, pero matapos manalo, daig pa ng patay at hindi man lang nagpaparamdam!