BEERMEN, SEMIFINALIST NA

UMENTRA ang defending champion San Miguel Beer sa semifinals matapos manalo sa do-or-die Game 3 kontra TNT KaTropa, 96-86, kagabi sa best-of-three quarterfinals ng PBA Philippine Cup sa Araneta Coliseum.

Nangalabaw si five-time Most Valuable Player, (MVP) June Mar Fajardo ng 32 points at 14 rebounds upang tulungan ang Beermen na isampa sa semis at manatiling may tsansa sa asam na five straight Philippine Cup titles. Makakalaban ng San Miguel sa semis ang No. 1 seed Phoenix Fuel Masters na kinalos ang Alaska Aces.

Maagang nagparamdam ng lakas ang Beermen sa first quarter, hinawakan nila ang 15-point lead, 25-10 bago umalagwa sa 53-27 sa halftime. “Our team showed what it is really built, that is the defense. They are self-motivated plus the message given to them by the managerment,” hayag ni San Miguel Beer coach Leo Austria.

Sina Fajardo at Fil-German Christian Standhardinger ang nagtulungan sa opensa para sa SMB sa unang dalawang periods at dahil sa laki ng lamang ay nakontrol nila ang buong laro.Tumipa si Standhardinger ng 17 markers at siyam na rebounds habang bumakas si Terrence Romeo ng 11 pts. para sa Beermen.

Namuno sa opensa para sa KaTropa si Roger Pogoy na kumamada ng 16 puntos at limang boards habang sina Brian Heruela, Troy Rosario, Yousef Taha at Jayson Castro ay nagtala ng tig-10 markers.

Samantala, winalis ng University of Santo Tomas ang University of the Philippines, 25-21, 25-12, 26-24, upang panatilihing buhay ang pag-asang umusad sa Final Four round sa pagpapatuloy kahapon ng second round ng UAAP Season 81 Women’s Volleyball Tournament sa FilOil Flying V Center sa San Juan.

Umiskor si league leading scorer Sisi Rondina ng 20 puntos mula sa 17 hits, 1 block at 2 aces bukod pa sa digs at 8 excellent receptions upang pamunuan ang Tigresses sa pag-angat sa markang 8-4, panalo-talo kasunod si rookie Eya Laure na may 11 puntos.

Sanhi ng panalo, tumabla sila sa ikatlong puwesto sa Far Eastern University na nauna nang nagwagi sa National University at nakasiguro ng playoff para sa huling dalawang Final Four berth habang bumagsak naman ang Lady Maroons sa patas na markang 6-6. (ATD/VA)