Alamin mula kay Maestro... SADLAKANG KAPALARAN NG MGA KAMBING O TUPA NGAYONG 2019

Maestro Honorio Ong

SA pagkakataong ito, ang pangunahing katangian at sadlakang kapalaran ng animal sign na Kambing na min­san ay tinatawag ding Tupa ngayong 2019 ang ating tatala­kayin.

Tandaang, ikaw ay mapa­bibilang sa Year of the Goat o Sheep kung ikaw ay isinilang noong mga taong 1931, 1943, 1955, 1967, 1979, 1991, 2003 at 2015.

Ang Year of the Goat o Sheep ay pinaghaharian ng impluwensiya ng planetang Moon at sa Western Astrology, ang Year of the Goat o Sheep ay siya ring kumakatawan sa zodiac sign na Cancer.

Pinaniniwalaang may ilang mabibigat na pagsubok na kahaharapin ang mga Kambing o Tupa na isinilang sa panahon ng tag-ulan o taglamig kaysa sa mga Kambing o Tupa na isi­ni­lang sa panahon ng tag-araw o tag-init. Subalit, anumang mga pagsubok ang dumating sa na­sabing animal sign, basta pa­tuloy lang silang naniniwala sa kanilang taglay na kakayahan, walang pagsubok o mga sulira­ning hindi nila makakayanang lutasin.

Sinasabing bukod sa taglay na kabaitan at may mahinang personalidad, sa 12 animal signs na naglakbay at nakarating sa palasyo ni Lord Buddha, ang Kambing o Tupa ang pinaka­ma­tulungin, mapagbigay, ma­da­ling maawa at may mababang kalooban.

Dagdag pa rito, tahimik, tapat at mabait ang Kambing o Tupa, kaya itinuturing silang napakadaling mapasunod at utusan na kadalasan ang kaba­itang ito at pagiging tahimik at sunod nang sunod ay inaabuso ng mga taong mapagsamantala, lalo na ng kanilang mga nagi­ging kaibigan at nakakasama.

Bukod sa mabait, ang mga Kambing o Tupa ay madali ring maawa at mabagbag ang dam­damin, lalo na sa mga ta­ong mahirap ang pamumuhay at alam nilang walang-wala.

Kaya kapag hindi naging ma­ingat at mapili sa pakikipag­kaibigan at pakikipagsosyo sa negosyo o kaya ay hindi ma­ingat sa mga taong kanilang pagkaka­tiwalaan, malaki ang posibilidad na ang Kambing o Tupa ay ma­loko ng kanilang mga kasama.

Kaya ngayong Taon ng mga Baboy, walang dapat gawin ang Kambing o Tupa kundi ang maging ma­pag­mat­yag at bago sumu­ong sa tran­saksiyon, si­gu­radu­hin muna nila ang kata­pa­tan ng mga taong ka­ni­lang naka­u­usap upang ma­iwasan na sila ay maloko o ma­isahan ng mga ta­ong mapag­saman­tala.

At dahil mabait at maawain ang Kam­bing o Tupa ay ipi­napalagay ding sob­rang emos­yunal at maramdamin sila, ga­yundin mada­ling nai­implu­wensi­ya­han ng mga taong ka­ni­lang nakaka­sama. Ibig sa­bihin, madaling mauto at ma­bola ang mga Kambing o Tupa.

Kaya kadalasan, nagiging biktima rin sila ng maling pa­lagay kung saan kapag sinasabi mo sa Kambing o Tupa na wala kang kuwentang tao, mahina ang iyong personalidad at su­nud-sunuran ka lang sa asawa o taong umiimpluwensiya sa iyo at wala kang sariling dis­posis­yon sa buhay, malamang na paniwalaan kaagad ito ng Kambing o Tupa.

Kaya kapag ikaw ay may boyfriend, girlfriend o asawa na isinilang sa animal sign na Goat o Sheep, ang dapat mong gawin ay huwag na hu­wag mo siyang pagsasabihan ng mga negati­bong salita na ika­sisira ng kan­yang diskarte at pagkatao dahil kung ano ang sasabihin mo sa kanya, mas malamang na pa­nini­walaan ka niya dahil ang mga Kambing o Tupa ay ma­daling maim­pluwensiyahan ng mga sinasabi sa kanya ng ibang tao, lalo na ng mga taong mahal niya at malalapit sa kanya.

Kaya kung ikaw ay may boyfriend, girlfriend o asawa na Kambing o Tupa, ang dapat na sabihin mo sa kanya ay ang mga positibo niyang kata­ngian at palagi mo siyang pu­rihin at bigyan ng positive re­inforce­ment dahil sa ganu’ng paraan, paniniwalaan niya ito, kaya naman siguradong kung ano ang sabihin mo sa kanya, ha­limbawa ay sinabi mo sa kan­yang “magtatagumpay ka, uunlad at magiging maligaya, habambuhay” – paniniwalaan niya ito at siguradong sa ban­dang huli, kung ano mismo ang sinabi at idinikta mo sa kanya, ‘yun mismo ang paniniwalaan niya at siguradong ‘yun din mismo ang mangyayari sa kanya, hindi lamang sa kan­yang bu­hay kundi sa kanyang kapa­la­ran. (Itutuloy)