NAGIBA ANG NLEX BINANGGA ANG GINS

TUMITIBAY ang kapit ng Barangay Ginebra sa No. 4 spot ng team standings matapos kalusin ang NLEX Road Warriors, 105-96 kagabi sa PBA Philippine Cup sa AUF Sports Arena & Cultural Center, Angeles City.

Kumayod si Japeth Aguilar ng 27 points at siyam na rebounds upang tunggain ang three-game winning streak at itarak ang 6-3 card para sa crowd favorite Gin Kings.

Nalasap naman ng Road Warriors ang pang-anim na talo sa 10 laro. Humarurot ang Road Warriors sa simula ng laban, hinawakan nila ang 11-point lead, 30-19 sa first quarter.

Pero pumalag ang Gin Kings, tinungga nila ang 27-21 bentahe upang tapyasin ang kanilang hinahabol sa lima, 46-51 sa halftime. Lalong ginanahan ang Barangay Ginebra sa third canto, tumarak ng 28-21 para agawin ang bandera, 74-72 papasok ng fourth quarter.

Samantala, puntirya ng TNT KaTropa na pahabain ang kanilang winning streak sa anim pagharap nila sa NorthPort ngayong alas-4:30 ng hapon sa Araneta Coliseum.

Tangan ang 7-3 karta, nakatambay sa pangatlong puwesto ng team standings ang KaTropa at may tsansa pa itong umakyat sa No. 2 kapag nanalo sila sa Batang Pier.

Nakatambay sa second spot ang Rain or Shine Elasto Painters tangan ang 8-3 card habang solo sa tuktok ang Phoenix Fuel Masters na kapit ang 9-2 karta.

Kinalos ng TNT ang Columbian Dyip, 101-98 noong Biyernes, nagtala si Jayson Castro ng 20 points at pitong assists para sa KaTropa.

Kaya inaasahang si Castro muli ang kakapitan ng TNT para makuha ang pang-walong panalo.

Makakatuwang ni Castro sina Ryan Reyes, Troy Rosario at Roger Pogoy na maganda ang inilaro sa kanilang huling laban. Para sa NorthPort na may 2-6 record, kailangan nilang manalo upang manatili sa asam nilang makapasok sa quarterfinals. (ATD)

Mga laro ngayon: (Araneta Coliseum)

4:30 p.m. - NorthPort vs TNT

6:45 p.m. - San Miguel Beer vs Alaska