LAKAS NG DEPENSA NI PITCHER BASA, ADAMSON PA-FINALS NA SA SOFTBALL

SINANDIGAN ng de­fending 8-peat UAAP soft­ball champions Adam­son University ang kanilang pangunahing pitcher na si Lyca Basa at sa kanilang depensa upang magapi ang National University, 2-1, para maitakda ang kanilang ika-9 na sunod na Finals ap­pearance kahapon ng umaga sa UAAP Season 81 Softball Tournament sa Rizal Me­mo­rial Baseball Stadium.

Hawak ang 2-1 na kala­mangan pagpasok ng final inning, tatlong outs na la­mang ang kailangan ng Lady Falcons upang ganap na makausad ng Finals.

Kaugnay nito ay pinag­sabihan sila ni head coach Ana Santiago na manatiling focus sa laro para makamit ang panalo. “Sabi ko sa ka­nila, lamang pa tayo, huwag kayong mag-panic. Kumu­ha tayo ng isang out, maku­kuha natin to.”

Unang nakapagtala ng dalawang runs ang Lady Falcons bago ito natapyas sa isa ng Lady Bulldogs sa fourth inning. Doon na nag­paalala sa Lady Falcons si Santiago na sinunod nila upang maitakda ang pag­pasok muli sa kampeonato.

Solong bumato sa kabu­uan ng laro si Basa kung saan nagbigay lamang ito ng limang hits at isang run sa NU. Maghihintay na la­mang ang Adamson kung sino ang magwawagi sa semifinals series ng De La Salle Uni­versity at University of Santo Tomas na magsisimula sa Biyernes-Marso 29. (VA)