CUIZON, PINAGMALUPITAN MUNA BAGO NAG-CHAMP SA CARCAR OPEN

INIANGAT ni Kirk Aia Cuizon ang antas ng kan­yang pagsulong sa mga pi­yesa ng ahedres upang pa­ngunahan ang pagtawid sa meta ng Carcar Open Chess Tournament sa Super Metro Event Center ng Carcar City, Cebu.

Anim na magkakasunod na panalo ang ipinoste ni Cuizon, 22-anyos at isang Cebu Technological Univer­sity stalwart, bago ito nag­menor sa isang draw para selyuhan ang kampeonato sa torneong umakit ng 46 na disipulo ng chess.

Nakatikim ng malupit na paorma ang kampeon, may rating na 1888, sina Kristel Cloe Cuizon (round 1), Ailo Barangan (round 2), Sarah Yvonne Chavez (round 3), Randy Laurido (round 4), no. 2 Cristy Cabungcag (round 5) at topseed Hector Villamora (round 6) saman­talang sa hatian ng puntos nauwi ang laro niya sa hu­ling round laban kay 7th ranked Jovanie Corro. Kabuuang 6.5 puntos at performance rating na 1902 ang naipakita ni Cuizon.

Pumangalawa si Ca­bung­cag matapos makaipon ng 6 puntos samantalang ang pre-tournament favorite na si Villamora ay nasadlak sa 3rd place dahil sa nako­lektang 5.5 puntos at mas mataas na tiebreak points. Nakuha ni Corro ang pang-apat na posisyon (5.5 pun­tos) habang itinanghal na 5th best woodpusher si unrated Ailo Barangan dahil sa rekord na 5 puntos.

Samantala, pinatunayan ni Havere James Sumatra na angkop sa kanya ang “top­seed” na bansag nang su­mulong siya papunta sa trono ng Monkayo Chess Club Tournament sa Davao dala ang halos walang mant­sang kargada na apat at kala­hating puntos (mula sa apat na panalo at isang tabla).