YULO, SERYOSO SA 2020 OLYMPICS, SASABAK SA BAKU WORLD QUALIFIER

IPAGPAPATULOY ni Carlos Edriel Yulo ng Pi­li­pinas ang kanyang paglalak­bay patungo sa 2020 Tokyo Olympic Games sa pama­magitan ng paglahok sa pa­nga­lawang olympic quali­fier ngayong taong ito na ti­naguriang Federation Inter­nationale de Gymnastique (FIG) Baku World Cup sa Azerbaijan simula Marso 14 hanggang 17.

Kasamang lalahok ng 19-anyos na si Yulo ang kababayan at SEA Games double gold medalist Rey­land Capellan sa malupit na kompetisyong umaakit na ng mga kalahok mula Ar­gen­tina, Australia, Austria, Belgium, Belarus, Brazil, China, Croatia, Egypt, Spain, Finland, France, Great Bri­tain, Georgia, Germany, Greece, Guatamela, Hong Kong, Honduras, Hong Kong, India, Iran, Israel, Italy, Japan, Kazakhstan, Korea, Mexico, Nether­lands, New Zealand, Roma­nia, Russia, Slovakia, Swe­den, Taipei, Turkey, Swe­den, USA at ang punong-abalang Azerbaijan.

Si Yulo ay babanat sa apat na events: floor exer­cise, parallel bar, horizontal bar at vault. Sa kabilang dako, ang 25-anyos na si Capellan ay nakatutok sa floor exercise at vault.

Sariwa si Yulo sa pag­kopo ng korona ng floor exer­cise event noong nakaraang buwan sa 2019 World Cup Gymnastics sa loob ng Mel­bourne Arena.

Nagkampeon si Yulo sa event na pang-seniors sa tulong ng kanyang iskor na 14.566 puntos. Walang du­ngis ang kanyang perfor­mance sa sagupaan.

Sa elimination round ng bakbakan sa Australia, pu­mangatlo si Yulo sa elimi­nations sa likod nina Ahmet Onder ng Turkey at Zapata.

Kasama rin sa mga naka­tung­gali ng Pinoy sa huling yugto ng event bukod sa Ha­pones, sa Turkish pride, Bri­ton gymnast at sa Kastila ay sina Casimir Schimidt ng Netherlands at ang alas ng punong-abala na si Christo­pher Remkes. Dahil sa tagumpay, nag­tutuluy-tuloy ang podium streak ng Pinoy.

Noong 2018 World Championships sa Doha, Qatar, nakagawa ng kasay­sayan ang binatilyo bilang unang kinatawan ng Pilipi­nas na nakasampa sa podi­um matapos itong itang­hal na bronze medal winner. (Eddie M. Paez, Jr.)