TOLENTINO PINADAPO ANG LADY EAGLES SA UAAP WOMEN’S VOLLEYBALL TOP SPOT

NAKISALO ang Ateneo de Manila sa liderato ng women’s division pagkaraang pabagsakin ang University of the East , 25-15, 25-21, 25-16 kahapon sa UAAP Season ‘81 Volleyball Tournament sa Araneta Coliseum.

Muling nanguna para sa Ateneo si Kat Tolentino na nagtala ng walong hits, 3 blocks at 2 aces para sa kabuuang 13 puntos.

Ang panalo ang ikatlong sunod ng Lady Eagles pagkaraang matalo sa una nilang laro upang humanay sa pangingibabaw kasama ng University of the Philippines at ng De La Salle na may barahang 3-1, panalo-talo.

Nag-ambag naman si Maddie Madayag ng 11 puntos na kinabibilangan ng 8 kills at 3 blocks kasunod si Bea De Leon na may 8 puntos.

“They accepted my challenge, that we have to win convincingly today. They really worked hard. Wala kaming game sa buong week. They worked hard and sacrificed a lot,” pahayag ni Lady Eagles coach Oliver Almadro.“We will not stop here, we will use this as a stepping stone for us to have a brighter future and for us to have a good outcome in the next game.”Nanguna naman para sa Lady Warriors si Judith Abil na may 14 puntos at 18 excellent receptions.

Dahil sa kabiguan, ang Lady Warriors na nagtala ng 24 na errors ay bumagsak sa markang 1-3. (VA)