BULLS SINUWAG ANG HAWKS SA 4 OT CELTICS, MAS MALAKAS SA WIZARDS

PERPEKTO si Lauri Markkanen sa 3-shot foul sa ikaapat na overtime upang ilagay sa kalamangan ang Chicago at tulungan ang bisitang Bulls na makatarak ng 168-161 win laban sa Atlanta Hawks sa NBA game kahapon.

Si Markkanen ay na-foul ni Alex Len ng Atlanta sa 3-point attempt sa nalalabing 1:59 na tatlong sunod na nagawa ang 3. Bahagi ito ng 7-0 Chicago run upang maiposte ng Bulls ang ikalawang straight victory at ika-5 nila sa anim na laro. Tumapos si Markkanen na may 31 points, ang ika-12 niyang straight game na may 20-plus points. Dumagdag siya ng 17 rebounds para sa kabuuang ika-5 straight double-double, career best.

Bumasket si Zach LaVine ng Chicago ng career-high 47 points at may 6-for-14 sa 3-point attempts at may 9 rebounds at 9 assists. May 31 puntos si Otto Porter Jr. 7 treys at 10 rebounds. Nakagawa sa Atlanta ng career-high 49 points si rookie Trae Young, na may 17-for-33 at anim na 3-pointers, 16 assists at 8 rebounds. Bumalikat si Len ng 24 points at 10 rebounds.

Samantala, pinamunuan ni Al Horford ang 7 players sa dobleng pigura sa bisa ng 18 puntos nang talunin ng Boston Celtics ang bisitang Washington Wizards, 107-96 para tuldukan ang 4-game losing streak. Nakagawa si Kyrie Irving ng 13 points at 12 assists para sa Celtics na nakuha ang unang panalo mula noong All-Star break. May 17 puntos si Marcus Morris at may 16 si Marcus Smart. (MC / ATD)