ISASABAK SA IBAYONG DAGAT, MGA CHAMP SA 7-11 MARATHON

Photo : Takbo Kabitenyo

NAGPAKITA ng bilis at lakas ng mga kasapi ng Team Soleus sa matagum­pay na pagtatapos ng Run 7-Eleven 2019 Manila Leg Linggo ng umaga sa Filinvest-Alabang. Nakamit ni Anthony Nerza ang 42.195 km Marathon ang kampeonato habang napunta kay Rafael Poliquit ang bagong tatag na 32-km karera.Iniwan ng tubong-Davao na si Nerza ang mga katunggali sa loob ng apat na ikot sa loob ng Filinvest City na nagsimula ng 11:00 p.m. noong Saba­do. Pumangalawa si Albert Omboga ng Kenya at ikatlo si Eugine Postrado. Tinapos ni Poliquit ang tatlong ikot sa 1:57:56. Iniwan niya sina Jujet de Asis at Eric Panique.

Sa panig ng kababaihan, kampeon si Maricar Repuyan sa Marathon 3:20:05. Pumangalawa ang isa pang pam­bato ng Team Soleus na si Cinde­rella Lorenzo (3:41:08) habang pangat­lo si Melanie Malihan. Ang beteranang si Luisa Raterta ang reyna ng 32-km sa 2:24:21, sinundan nina Jocelyn Elijiran at Silamie Apolistar.

Samantala, panalo si David Kip­sang (1:09:33) ng Kenya sa 21-km kontra kay Richard Salano (1:13:11) at Gilbert Laido (1:16:59). Si Christabel Martes (1:28:49) ang kampeon sa kababaihan laban kay Nhea Ann Barcena (1:31:52) at Elaine Qui­s­mundo (1:37:39).

Lahat ng mga nagkampeong Pinoy ay ipadadala ng 7-Eleven sa isang karera sa ibayong dagat tulad noong isang taon kung saan inangat nila ang bandila ng Pilipinas sa Jeju Marathon sa Timog Korea. Ang karera sa Filin­vest ay sinabayan ng parehong pa­takbo sa mga lungsod ng Cebu at Davao na may pinagsamang mahigit 39,000 ma­­na­nakbo na nagpalista.