VALDEZ AT PABLO, ABANGERS SA PREMIER VOLLEY LEAGUE

NAKATAKDANG pangunahan ng dating UAAP 3-time MVP na si Alyssa Valdez ng Creamline at ng kapwa power-hitter na si Myla Pablo ng Motolite ang mga manlalarong magpapakitang-gilas sa Premier Volleyball League All-Star Game sa Sabado sa FilOil Flying V Centre sa San Juan City.

Pamumunuan nina Valdez, ang reigning PVL Open Conference Most Valuable Player at Pablo na isa ring dating league MVP ang kani-kanilang mga koponan sa idaraos na masaya at competitive na laban na syang magpapasimula ng panibago at ikatlong season ng PVL.

Sisimulan ang laro ng 4 p.m. at mapapanood ito ng live sa ABS-CBN S+A HD Channel 166 at via livestream. Hangad din ng nasabing laro na makalikom ng pondo para sa Hero Foundation. “This is our gift to the fans as well as raising funds for charity,” pahayag ni PVL chief Ricky Palou.

Ang mga kakampi ni Valdez ay sina Ateneo players Deanna Wong, Maddie Madayag at Dani Ravena, Petro Gazz stars Chie Saet at Jessie de Leon, ang mga teammates niya sa Creamline na sina Michele Gumabao, Mel Gohing at Risa Sato, BanKo-Perlas standouts Nicole Tiamzon at Kathy Bersola, Iriga-Navy hitter Grazielle Bombita at University of the Philippines ace spiker Isa Molde.

Gagabay sa kanila bilang coach si Petro Gazz coach Jerry Yee. Kasama ni Pablo sa koponan ang mga Creamline teammate ni Valdez na sina Jia Morado at Jema Galanza, BanKo-Perlas players Jem Ferrer at Joy Dacoron, Ateneo belles Kat Tolentino, Vanessa Gandler at Bea de Leon, Petro Gazz hitters Jonah Sabete at Cherry Nunag, Tacloban spiker Dimdim Pacres, Pocari-Air Force tower Dell Palomata at Adamson-Akari star Thang Ponce.

Magsisilbi namang mentor ng koponan si Ateneo coach Oliver Almadro. (VA)