Mga nasa likod ng pagsabog sa Sulu, tugisin!

KAISA tayo sa pagkondena sa naganap na magkasunod na pagsabog sa Mount Carmel Cathedral sa Jolo, Sulu na ikinasawi ng halos 30 katao.

Umaasa tayong mananagot sa batas ang mga salarin.

Hindi maikakaila na tila hinahamon ng mga ito ang gobyerno at gustong makita kung hanggang saan ang kapangyarihan nito.

Gayunman, tiniyak ng pamahalaan na walang sasantuhin sa mga kalaban at tutugisin ang mga ito. Hindi umano mahahabag o maawa ang gobyerno at ipatutupad ang kaukulang batas laban sa mga salarin.

Nakapanlulumo dahil sa kabila ng kagustuhan ng marami na mamuhay nang payapa, may mga taong pilit itong hinahadlangan.

Ang resulta, may mga pangarap na gumuguho at may mga buhay na nasasayang.

Samantala, pakiusap naman sa mga residente ng Sulu, mag-ingat at maging kalmado.

Ngayong panahong nalalagay sa pagsubok ang ating bayan, wala tayong ibang dapat gawin kundi ang lalo pang magpakatatag at magkaisa.