SALVADOR, HARI SA 14 NA MGA BANSA SA LAOS OPEN

KINORONAHAN ang untitled pawnpusher na si Louie Salvador ng Pi­lipinas bilang hari mat­apos na mangibabaw la­ban sa mga kinatawan ng 14 na iba pang mga bansa sa pagbaba ng telon ng 2nd Laos International Open Standard Chess Championships sa Van­sana Hotel ng Vientiane Capital, Laos.

Pitong panalo, dala­wang tabla at walang talo ang ipinakita ni Salvador (may FIDE rating na 2225) at ginawa niyang tulay papunta sa trono pagka­tapos ng siyam na rounds ng bakbakan sa bansang ito sa Timog Silangang Asya kung saan nagsisi­mula nang sumigla ang larangan ng ahedres.

Malayong pangalawa si Colin Hornell ng Scot­land (FIDE Rating: 2110) dahil sa kartada nitong pitong puntos mula sa pi­tong panalo at dalawang talo sa paligsahang uma­kit ng 48 na woodpushers mula sa iba’t-ibang bansa kagaya ng Indonesia, In­dia, Canada, Pilipinas, USA, Thailand, Singa­pore, Malaysia, Scotland, Australia, Netherlands at Laos.

Nagtagpo sa pangat­long baytang sina Interna­tional Master Mathew Tan ng Netherlands (FIDE Rating: 2422), Indian FIDE Master Sauravh Khher­de­kar (FIDE Rating: 2283) at FM Wiwatanadate Poompong (FIDE Rating: 1968) mula sa Thailand hawak ang rekord nilang tig-6.5 puntos.

Pero nang pairalin ang tuntunin sa tiebreak, na­kuha ni Tan ang tersera, pumang-apat si Khher­dekar at nakuntento sa panglimang posisyon si Poompong.

Kasalukuyan pang ginaganap ang labanan sa rapid chess at blitz chess ng paligsahang inorga­nisa ni Inthava Vilavane at ng Laos Chess Fede­ra­tion.