DIAZ, MATIKAS PA, LALAHOK SA 2019 SEA GAMES AT 2020 TOKYO OLYMPICS

DAHIL hindi na bata at mahaba na ang kanyang pinagdaanan sa weightlifting na nagbigay sa kanya ng maraming karangalan at sa bansa, sinabi ni Brazil Olympic silver medallist at Asian Games gold medallist Hidilyn Diaz na lalahok siya sa 2019 Southeast Asian Games at 2020 Tokyo Olympics bago niya iwanan ang weightlifting.

“Hindi na ako bata. It’s high time to leave weightlifting at bigyan ang mga bata ng pagkakataon na lumaban sa labas,” sabi ni Diaz na magdiriwang ng kanyang ika-28 kaarawan sa Pebrero. Sinabi ni Diaz na gagawin niya ang lahat at muling bigyang ng karangalan ang bansa at panatilihin ang magandang record sa SEA Games. “Pipilitin kong manalo at ayaw kong biguin ang aking mga kababayan at umaasang makakamit ko ang tagumpay.” Ayon sa tubong-Zamboanga lalahok siya sa qualifying upang makasabak sa 2020 Tokyo Olympics. “Back to zero ako. Kailangan makapasa ako sa mga qualifying competitions para maka paglaro sa Tokyo Olympics,” ani Diaz.

Kamakailan lumaban si Diaz sa World Weightlifting sa Turkmenistan matapos manalo sa Asian Games. Ang dating Russian satellite sa Central Asia ay lugar kung saan nanalo si Diaz ng ginto sa Asian Indoor Games at Martial Arts na ginawa sa Ashgabat na pinamunuan ni Philippine Taekwondo Association secretary general at Seoul Olympian Monsour del Rosario.