AMIT AT CENTENO, LALARGA SA WOMEN’S WORLD 9-BALL STAGE 2
SASARGO na ngayong Huwebes, Disyembre 6, ang stage 2 ng ginaganap na 2018 Women’s World 9-Ball Championships kung saan 64 kababaihang bilyarista ang may tsansa pang makaakyat sa trono ang hinati sa walong pangkat sa loob ng Sanya Sports Center Gym sa Lungsod ng Sanya, Hainan Province, China.
Nasa Group B ang 2-time world 10-ball champion na si Rubilen Amit ng Pilipinas samantalang ang SEA Games titlist at kababayang si Chezka Centeno ay nakasalang sa Group C ng kompetisyong magkakaloob ng USD 175,000 sa mga makakapasok ng winners’ circle at isinasaayos ng Chinese Billiards & Snooker Association at Beijing Guoao Zhonghe Culture Company.
Kasama sa mga nag-aambisyon sa korona bukod kay World Pool Billiards Association (WPA) no. 8 na si Amit at WPA no. 17 na si Centeno ay ang mga pinakamalulupit na manunumbok sa iba’t-ibang parte ng mundo tulad ng Great Britain, Japan, Korea, Indonesia, Venezuela, Belarus, Russia, Austria, Argentina, Slovenia, Poland, New Zealand, Singapore, Spain, Canada, Portugal, ang Taiwan na may kinatawang 7 manlalaro at ang punong-abala na China na may 21 kalahok sa final 64.
Kasama sa mga prominenteng kalahok sa paligsahan ang pinakamalupit na bilyaristang babae na si Chen Siming ng China (WPA no. 1), Taiwanese Chou Chieh Yu (WPA no. 2), Han Yu mula pa rin sa China (WPA no. 3), GBR ace Kelly Fisher (WPA no. 6), Korean Kim Ga-young (WPA no. 9) at ang mga perennial contenders na sina Jasmin Ouschan ng Austria, Korean Park Eun-ji at ang British na si Alison Fisher.
Comments