PAGHAHANDA NG WRESTLING SA 2019 SEAG, SINIMULAN NG GO-FOR-GOLD

SINISIMULAN na ng Go For Gold wrestling team ang preparasyon para sa 2019 SEA Games na idaraos sa bansa. Bago matapos ang 2018, lalarga ang Philippine Go For Gold wrestling team para mag-ensayo sa ibang bansa upang masungkit ang gold medal sa 2019 Southeast Asian Games.

Handa nang sumabak sina two-time SEAG gold medalist Margarito Angana Jr. at mga beteranong sina Jhonny Morte at Alvin Lobreguito para sukatin ang lakas kontra mga petmalung wrestlers sa Jagsport Wrestling Championship sa Singapore sa Dis. 6-9.

Aaksiyon si Angana sa 61-kilogram men’s freestyle senior event habang si Lobreguito at Morte ay lumarga rin sa 57kg at 65kg ng parehong event kung saan ang grapplers mula Uzbe­kistan, Australia, Taiwan, Hong Kong, Indonesia, Thailand at Singapore ay haha­rapin nila.

Hahabol din sa gold medals sa three-day tourney sina Royce Tiu (86kg), Ronil Tubog (61kg), Jonathan Maquilan (65kg) at sa cadet division entry na si Cadel Hualda (80kg). “I believe that our wrestlers will do well and continue to prove that we are one of the best in Asia,’’ ayon kay Go For Gold godfather Jeremy Go.

Bukod sa wrestling, suportado ng Go For Gold ang training at exposure ng national at junior athletes ng cycling, triathlon, sepak takraw, skateboarding at dragonboat. “We need to expose our wrestlers to this kind of tournament if we want to achieve something in the SEA Games,’’ ayon kay Go For Gold project director Edna­lyn Hualda, dating national grappler.

Sasamahan ang team sa Singapore ng coaches at dating national wrestlers Mi­chael Baletin at Efrelyn Crosby. May 15 gold medals ang nakataya sa wrestling sa 30th SEA Games na nakaiskedyul sa five weight categories sa men’s Greco Roman, freestyle at wo­men’s freestyle. (VA / MC)