WESTBROOK, BINALIBAG ANG CAVS; EMBIID, BIDA SA 76ERS

ITINALA ni Russell Westbrook ang kanyang ika-107th career triple-double upang balibagin ng Oklahoma City Thunder sa bisa ng 100-83 victory ang bisitang Cleveland Cavaliers sa NBA game kahapon.

Tumabo si Westbrook ng 23 points, 19 rebounds at 15 assists. Dumagdag si Jerami Grant ng 21 points sa itinalang career high para sa Thunder habang si Paul George ay may 18.

Nakagawa si Westbrook ng triple-double sa third quarter, ang katulad ding career feat ni Jason Kidd na ikatlo sa NBA history sa naturang kategorya sa likod ni Oscar Robertson (181) at Magic Johnson (138). Pinalakas pa ng Oklahoma City ang depensa sa third quarter at dito nalamangan ang Cleveland sa 15 points.

Samantala, ang 26 na puntos ni Joel Embiid, 14 rebounds at 7 assists ang nag-angat sa Philadelphia 76ers upang pahiyain ang dumayong New York Knicks, 117-91.

Bumasket si Embiid ng league-best 21st double-double. Bilang dagdag sa kanyang ika-18 laro ng 20 puntos at 10 rebounds.

Dumagdag si JJ Redick ng 24 points habang si Ben Simmons ay may iniambag na 14 points, 8 rebounds at 7 assists para sa Philadelphia. Umiskor si Furkan Korkmaz ng 11 points at si Mike Muscala ay 10 nang magwagi ang Sixers ng dalawang sunod.

Pinag-ibayo rin ng Sixers ang marka nilang 11-1 sa sariling balwarte habang naka-6 na panalo sa 7 laro. May 17 puntos si Enes Kanter at 6 rebounds para sa Knicks, habang si Mario Hezonja ay may 17 points. (ATD/MC)