Natuldukan ang pagiging atleta dahil sa palpak na bakuna... HUSTISYA PARA SA BATANG MANLALARO NG SOC

PAO CHIEF PERSIDA ACOSTA / DAING MULA SA HUKAY HUSTISYA

SI Lance Allen Mitra, 12 taong gu­lang, nakatira sa La­guna ay batang at­leta, manlalaro ng soccer na marami nang naipong me­dalya. Panaghoy ng kanyang ina at ama ang tumambad sa sambayanan, ka­ma­kailan dahil sa kabila ng pagi­ging malusog at prem­ya­dong manlalaro ni Lance Allen ay naging biktima rin siya ng nakapipin­sa­lang bakuna. Siya ang pang-isandaan at tatlo (103) sa mga sumailalim sa fo­rensic examination ng Public Attor­ney’s Office Foren­sic Team (PAOFT), bagay na hiniling ng kanyang mga magulang na isa­gawa sa kanyang labi.

“Miyembro po kami ng Iglesia Ni Cristo,” ang sabi ng tiyahin ni Lance Allen habang mugto ang mga mata nito. “Naku po, panlima na po ang pamangkin ninyo na kaanib ng INC, sa mga naging biktima na lumapit sa amin. Katulad po ninyo, minabuti nila na humanap ng hustisya at hindi ilagay ang batas sa kamay nila. Ngunit, mas nakararami po ang Katoliko sa mga bik­tima,” ang sagot ko. May ilang mga Obis­po la­mang na lantaran na nakikiramay sa pagka­matay ng mga binaku­na­han.

Maaaring ang iba ay tahimik lang na naghi­hintay ng aksiyon ng pamahalaan sa mga pa­simuno sa pagbili at pag-uutos na iturok habang nasa “clinical trial phase 3” pa ang bakunang ito.

Maraming lumala­bas na paninira mula sa mga katunggali ng mga bikti­ma laban sa Public Attor­ney’s Office (PAO) ha­bang papalapit ang paglabas ng resolution ng unang batch ng ka­song kriminal na isi­nampa ng mga magu­lang. Handang magtiis ang PAO sa pagtugon sa tawag ng tungkulin para sa paghahari ng hus­tisya.

Ang mga magulang naman sa pangunguna ni Gng. Sumachen Du­minguez ng Samahan ng mga Magulang na ang mga anak ay Bina­ku­nahan ng Dengvaxia (SMABD) ay lalong na­giging matatag ang ka­looban upang sang­ga­hin ang mga batikos na tila kasalanan pa ng PAO at ng mga magulang ang pagkamatay ng mga binakunahan.

Habang si Ate Annie Gabito ay lalong tuma­tapang upang manguna sa pagsagip sa mga bik­tima nang sa gayun ay maagapan at mabigyan ng hustisya ang mga namatay sa bagsik ng kamandag ng mga mik­robyo na laman ng hi­ringgilya.

Sino ba ang nagpa­hin­tulot at pumirma sa “purchase request” ng bakuna? Walang iba kundi si Dr. Raymundo Lo na Deputy Director for Professional Servi­ces ng Philippine Children’s Medical Center (PCMC). Siya ang nag-atas kay Dra. Sonia Gonzales na ipirma siya noong Ja­nuary 21, 2016 sa na­tu­rang dokumento.

Binili sa halagang tatlong (3) bilyong piso habang “experimental” pa ito.

Sina Sumachen at Ate Annie ay parehong mga ina na may mga hamon na pinagdaanan at patuloy na hinaharap hinggil sa mga trahed­yang may kaugnayan sa kanilang mga supling.

Ang mga personal na sakit at hinagpis na kaakibat ng kanilang mapait na karanasan ay nagsisilbing tulay sa pag-abot nila sa pamilya ng mga biktima ng na­sabing bakuna.

Ang mga mahal sa buhay ng mga biktima, hindi man magkaka­dugo ay madaling nag­kaintindihan, puso sa puso ang lalim ng kani­lang usapan at dama­yan. Ang ugnayang ito ang nagbubuklod sa kanila.

Ito ay patuloy pang lumalakas habang may natutuklasang mga ebi­densiya na pumapalaot sa imbestigasiyon ng Mababang Kapulungan ng Kongreso sa natu­rang bakuna tulad ng nadiskubre kamakailan ni Congressman XJ Ro­mualdo sa nasabing pirma sa “purchase re­quest.”

Sa darating na De­cember 3, 2018, may paglilitis sa Department of Justice (DOJ), para sa pangalawang batch ng mga kasong kriminal na isinampa ng mga ma­gulang ng na­matay pag­katapos ba­kunahan.

Ano kaya ang maga­ganap? Sana, ito ay mag­­bibigay ng pag-asa sa mga biktima, lalo na sa mga patuloy na nagpa­paramdam.

Sana, ay wa­­lang maghatid ng higit pang ikagagam­bala ng ka­nilang mga kalu­luwa.

(Itutuloy)