3 PINOY, LUSOT SA PULUTONG NG ALL-JAPAN 10-BALL FINAL

KASAMA ang mga Pinoy na sina Carlo Biado, Lee Vann Corteza at Jeffrey De Luna sa unang pulutong ng mga bilyaristang naka­usad sa final 32 ng World Pool Billiards Association (WPA) rated na 2018 All-Japan 10-Ball Billiards Championships sa Archaic Hall ng Amagasaki-city, Hyogo, Japan.

Limang iba pang mga pambato ng Pilipinas sa ka­tauhan nina 2017 All-Japan Championship king at WPA no. 9 Johann Gonzales Chua, 2017 World 9-Ball runner-up at WPA no. 10 Roland Gar­cia, Jeffrey Ignacio, Warren “The Warrior” Kiam­co at Ramil Gallego ay kasalukuyang nakikipagta­gisan pa ng husay habang isi­nusulat ang artikulong ito.

Dumapa sa tikas ni Bi­ado, 2017 World 9-Ball champion at WPA no. 3, si Japanese ace Tasuku Nishio, 11-2. Sa final 32, sasagupa ang Pinoy kay Taiwanese gem Liu Cheng Chieh sa torneong naglaan ng kabu­uang hala­gang JPY 6,316,000 (USD 56,780) para sa mga ma­ka­papasok sa winners’ cir­cle. Bahagi nito ang cham­pion’s purse na JPY 1,800,000 (US$16,185).

Hindi pinaporma ni Corteza, 2017 World Straight­pool titlist, si Indonesian Irsal Afrinneza Nasution, 11-3, habang taob din sa kapa­rehong iskor si Mathew Ed­wards ng New Zealand laban kay De Luna.

Si Hayato Hijikata ng Japan ang susunod na ma­kakalaban ni Corteza sa­man­talang isa pang Hapones (Toru Koribayashi) ang su­subok sa husay ni De Luna.