GONZALES-CHUA, TINUNTUNGAN SA ALL-JAPAN 10-BALL C’SHIPS

PINANGUNAHAN ng nagtatanggol na kam­pe­ong si Johann Gonzales Chua ang tropang Pinoy na umarangkada sa win­ners’ final stage ng World Pool Billiards Association (WPA) rates na 2018 All-Japan 10-Ball Champion­ships sa Archaic Hall ng Amagasaki City, Hyogo, Japan.

Dinaig ni Chua, WPA no. 9, si local ace Kiyotaka Ohashi, 9-6, upang hata­kin ang iba pang mga bil­yarista ng bansa na sina Carlo Bia­do, Warren Ki­am­co, Roland Garcia at Ramil Gallego sa susunod na yugto ng kom­petis­yong may kabuuang prize fund na USD 56,780 (JPY 6,316,000).

Susunod na hahara­pin ng 2017 Pinoy champion ang Hapones na si Dai­gon Shigemori.

Samantala, isang 9-6 na iskor din ang naging tulay ni Biado, WPA no. 3 at 2017 World 9-Ball King sa pag­daig kay Taiwanese Hsu Jui An. Ganito rin ang naging resulta ng tagum­pay ni Ki­amco, isang Ce­bu­anong may bansag na “The War­rior”, kontra kay Kouji Miyatani ng Japan.

Nangibabaw si WPA no. 10 at 2017 World 9-Ball bridesmaid na si Garcia la­ban kay Souichi Yano, 9-6, habang uma­ngat si Gallego kay Tomoo Takano, 9-7 sa kanilang pag­lalakbay upang maku­ha ang champion’s purse na nagkakahalaga ng USD 16,185 (JPY 1,800,000).

Nakahambalang sa da­anan nina Biado, Ki­amco, Garcia at Gallego sa susu­nod nilang laro sina Matthew Edwards (New Zealand), Kousuke Tou­jou (Japan), Katsuji Te­ruya (Japan) at Hayato Hijikata (Japan) ayon sa pagkakasunod-sunod.

Kasalukuyan pang naka­salang (o sasalang pa lang) sa mesa habang sinusulat ang artikulong ito ang iba pang mga Pi­noy cue artists na sina Antonio Lining, Lee Vann Corteza, Jeffrey Ig­nacio at Jeffrey De luna.