FEU VS. ATENEO NA SA SEMIS; TAMS, INILAGLAG ANG DLSU

ISANG 3-pointer ang ipinukol ni Arvin Tolentino na saktong pumasok sa nalalabing 3.1 segundo ng laro upang tanghaling bayani matapos ibigay sa Far Eastern University ang 71-70 panalo kontra De La Salle para makopo ang huling Final Four berth ng UAAP Season 81 Men’s Basketball Tournament kahapon sa Araneta Coliseum. Lamang pa ang Green Archers ng 4 na puntos sa huling minuto ng laro bago ibinaba ni Ken Tuffin ang bentahe sa dalawa,68-70, 39 segundo ang nalala­bi sa oras.

Kasunod nito matapos ang isang krusyal na defensive stop, nakita ni Jasper Parker na libre si Tolen­tino sa gitna, halos isang metro ang layo sa itaas ng 3-point arc at dito kumpi­yansang bumitaw ng tres ang huli na naging daan upang maagaw nila ang kalamangan sampu ng panalo.

Dahil dito, ang Tama­raws ang nagkamit ng karapatang sagupain ang topseed at defending champion Ateneo na may bentaheng twice-to-beat sa Final 4 round na magsisimula sa darating na Linggo.

Tumapos na topscorer para sa Tamaraws si Tolen­tino na may 15 puntos habang tatlo pang teammate niya ang nagtala ng double figure na kinabibi­langan nina Barkley Eboña na may 12 puntos, Ken Tuf­fin na may 11 puntos at Richard Escoto na may 10 puntos.

Bukod sa 12 puntos, kumaldag din si Eboña ng 16 rebounds upang punan ang kawalan ng kontri­bus­yon sa boards ng sen­trong si Prince Orizu na maagang nalagay sa foul trouble kaya hindi naram­daman sa depensa.

Nawalan ng saysay ang game high 20 puntos ni Santy Santillan dahil hindi nito naihatid ang Archers sa Final 4 round sa unang pagkakataon mula noong 2015. (VA)