NU, ‘DI PINAPORMA ANG FEU SA UAAP HIGH VOLLEYBALL

NAUNGUSAN ng reigning 4-time girls champion National Uni­versity ang Far Eastern University-Diliman, 27-29, 25-18, 25-27, 25-18, 15-9 para palawigin ang kanilang winning streak hanggang walong laro noong nakaraang Saba­do sa UAAP Season 81 high school volleyball tournament sa Blue Eagle Gym.

Nagsalansan si Shee­na Toring ng 18 puntos, habang tumapos si Alys­sa Solomon na may 17 puntos para manguna sa Junior Lady Bullpups sa paggapi sa Baby Ta­ma­raws.

Sanhi ng pagkatalo, bumagsak ang FEU-Dili­man na nakahugot ng 17 hits mula kay Lyann de Guzman sa 4-5, panalo-talong marka.

Umiskor naman sina Alleiah Malaluan at An­gel Canino ng pinagsa­mang 43 puntos para pa­munuan ang De La Salle-Zobel sa kanilang pama­mayani kontra University of Santo Tomas, 25-23, 25-19, 16-25, 27-25.

Bunga nito, tumatag ang kanilang kapit sa ika­lawang puwesto taglay ang barahang 6-2.

Bumaba naman ang Junior Tigresses sa karta­dang 5-4, isang laro ang agwat sa mahigpit nilang kaagaw na Baby Tama­raws para sa huling semi­finals berth.

Samantala, nanaig ang University of the East la­ban sa University of the Phi­lippines Integrated School, 22-25, 25-16, 25-17, 25-20, para sa panga­lawa nilang panalo nga­yong season. (VA)