Hindi sila nakapaghanda sa digmaan na pataksil kung tumira... MAGING ANG MAGIGITING NA MGA PULIS AY
PAO CHIEF PERSIDA ACOSTA / DAING MULA SA HUKAY HUSTISYA
NAGSAMPA ng panibagong batch ng Dengvaxia related criminal cases ang mga magulang at kaanak ng sampung (10) namatay matapos maturukan ng bakuna kontra dengue nang walang screening, blood test at medical diagnostic tests. Hindi rin na-blood test kung na-dengue na o hindi pa ang mga ito, bago maturukan ng nasabing bakuna. Ang sampung (10) namatay ay sina Wiljen Alcontin, Elezar Brigoli, Kianah Mae Racuya, Adeline Castroverde, Joanina Cortes, Kriscel Viaros, Glademier Juevesano, EJ Christian Apa, Thrishanne Casona at SPO1 Vicente Arugay. Pito (7) sa kanila ay mga taga- Cebu na nabakunahan na pinalawig ng Department of Health (DOH) ang pagbabakuna sa Region 7.
Si SPO1 Vicente Arugay naman ay nabakunahan na pinalawig sa humigit-kumulang sa 12,000 Philippine National Police (PNP) officers (as per Senate Blue Ribbon Transcript, 12/11/2017) sang-ayon kay Dr. Julius Lecciones ng Philippine Children’s Medical Center (PCMC). May mga taong nagsumite ng sinumpaang- salaysay para patunayan na nabakunahan nga si Arugay kahit hindi nabigyan ng Dengvaxia card.
Negatibo naman ayon sa mga doktor, ang blood test ni Arugay sa leptospirosis kahit nakalagay ang leptospirosis sa death certificate na ginawa ng ospital kung saan siya namatay. “Walang baha at palaging nakasapatos ang asawa ko noong Marso, 2018 bago siya maospital dahil palaging masakit ang ulo niya, tagiliran, hirap sa paglalakad at sumusuka ng dugo. Kaya paano siya magkaka-leptospirosis?” ang tiniyak ng asawa ni SPO1 Arugay.
“Magsalita na sana at huwag ng matakot ang mga kasama niyang pulis na nabakunahan para hindi manaig ang kasinungalingan ng ilan,”dugtong pa ng isang testigo. “Paano kaya naaatim ng ilan na dustain pa ang mga biktima at palabasing sinungaling ang mga ito bago malagutan ng hininga na sinasambit na nabakunahan sila at walang card na ibinigay sa kanila?” ang matinding himutok na dugtong ng isa pa. “Isipin natin na ang kapulisan ay naging bahagi rin pala ng eksperimento habang nasa clinical trial phase 3 pa hanggang Nobyembre 2017 ang nakapipinsalang bakuna. Hindi sila namatay sa tama ng bala o sa giyera, pero sa pamamagitan lang ng hiringgilya,” ang hinagpis ng mga ulila. “Walang “antidote” o pangontra sa side-effects ang gumawa ng bakuna”, ang dugtong pa ng isa.
Ang nabanggit na mga pulis ay walang nagawa sa kalaban na hindi nila alam na nagkukubli pala sa isang mabagsik na bakuna. Hindi sila handa sa ganitong uri ng digmaan na pataksil kung tumira dahil hindi nila ito nakikita.
Napakasakit ng sinapit nila — maging sa giyera ng mga bansa ay hindi pinahihintulutan ang mga armas at sandatang nagdudulot ng walang katuturang pagpapahirap. Walang puwang ang ganitong uri ng torture at panlilinlang sa sibilisadong ugnayan ng mga tao at bansa. At dahil nga nangyari na ang trahedyang ito, lalong walang puwang ang pangungunsinti at pagkukubli ng totoong pangyayari.
Hanggang kailan kaya ang paglaban ng resistensiya ng mga biktima laban sa bagsik ng side-effects (anaphylactic allergic reaction, viscerotropism, neurotropism at increase in severity of dengue) na inamin ng Sanofi noong ika-22 ng Disyembre, 2015 sa Food and Drugs Administration (FDA) sa submission nito for authorization, pharmacovigilance, surveillance plan? Sana, may antidote silang inihanda dahil nasa clinical trial pa pala ito!
Hindi bale, maghintay na lang tayo kung ano ang aksiyon ng mga prosecutor sa unang batch ng siyam (9) na namatayang pamilya ng mga nabakunahan na na-torture sa matinding sakit na naramdaman. Rest in peace sa first batch na kinabibilangan nina Anjielica Pestillos, Marc Axl Eboña, Jansyn Art Bataan, Zandro Colite, Lenard Baldonado, Aejaj Bautista, Abbie Hedia, Alexzander Jaime at Rei Jazztine Alimagno. Submitted for resolution na ang mga ito.
Magkaroon na sana ng katahimikan ang mga kaluluwa nila na hanggang ngayon ay patuloy na nagpaparamdam dahil sa paghihirap na naranasan.
(Itutuloy)
Comments