BUENDIA NG LADY EAGLES, NIRESBAKAN ANG MAROONS SA WOMEN’S BASKETBALL

KASUNOD ng masaklap na kabiguang natamo sa kamay ng Far Eastern University Lady Tamaraws, bumangon ang Ateneo de Manila University Lady Eagles at pinagbuntunan ng kanilang pagkadismaya ang UP Lady Maroons,63-51, kahapon sa UAAP Season 81 Women’s Basketball Tournament sa FilOil Flying V Centre sa San Juan City.

Pinigil ng nasabing panalo ang 6-game losing streak ng Lady Eagles bukod sa pag-angat sa rekord na 3-6 (panalo-talo). Nanguna si Cara Buendia para sa Lady Eagles sa ipinoste nitong double-double 14 puntos at 13 rebounds kasunod si Jolina Go na nag-ambag ng 13 puntos at Katrina Guytingco na may 12 puntos, 9 na rebounds at 4 na assists. “The important thing is that we lessened the turnovers. That’s the most important thing. That’s basically it and our energy was up,” ani Ateneo head coach John Flores. “We’ve been expecting that from her for a long time. I think she should start getting used to it and play a notch higher than that,” pahayag pa ni Flores tungkol naman sa ipinakitang laro ni Buendia.

Nakatulong din sa Lady Eagles ang naipuwersang 26 na turnovers sa Lady Maroons.

Nanguna sa winless pa ring UP si Danielle De Guzman na mayroon ding double-double na 11 puntos at 10 boards.

Samantala sa isa pang laro, tumabla ang Adamson sa University of Santo Tomas sa ikatlong posisyon matapos padapain ang University of the East, 76-75.

Ang panalo na pinangunahan ni Jamie Alcoy na umiskor ng 18 puntos, ang ikalima ng Lady Falcons sa walong laban at nagbaba naman sa Lady Warriors sa barahang 2-7. (VA)