2 Rider sugatan sa banggaan

@Balitang Probinsiya | April 29, 2022

AKLAN – Dalawang rider ang sugatan nang aksidenteng magkabanggaan ang dalawang motorsiklo kamakalawa sa Bgy. Laguinbanwa East, Numancia sa lalawigang ito.

Ang mga biktima ay nakilalang sina Ramil Barrera, 18-anyos at Jim Uguban, 25, kapwa nakatira sa nabanggit na bayan.

Ayon sa ulat, kapwa mabilis ang takbo ng mga motorsiklong minamaneho nina Barrera ar Uguban kaya nagkabanggaan ang dalawang sasakyan sa naturang barangay.

Nabatid na sa lakas ng pagkakabangga ay nagtamo ng malaking pinsala sa ulo at katawan ang mga biktima.

Dinala ng mga saksi ang mga biktima sa ospital at kasalukuyan na silang ginagamot, samantalang inaalam na ng pulisya kung sino sa dalawang rider ang may pananagutan sa aksidente.