2 Patay sa puno ng Acacia

@Balitang Probinsiya | May 16, 2022

ILOCOS SUR – Dalawa katao ang namatay at isa pa ang sugatan nang aksidenteng bumangga ang kinalululanan nilang kotse sa puno ng acacia kamakalawa sa Bgy. Gongogong, San Ildefonso sa lalawigang ito.

Ang mga nasawi ay sina Floresto Tulali at Federico Pascual, kapwa nasa hustong gulang, at ang sugatan naman ay si Khimberly Estabillo, 26-anyos, residente ng Batac, Ilocos Norte.

Ayon sa ulat, nawalan umano ng kontrol sa pagmamaneho si Tulali habang lulan ng sasakyan sina Pascual at Estabillo kaya bumangga ang kotse sa puno ng acacia.

Nabatid na sa lakas ng pagkakabangga ay nagtamo ng malaking pinsala sa ulo at katawan ang mga biktima.

Dinala ng mga saksi ang biktima sa ospital, pero idineklara itong dead-on-arrival sa pagamutan sina Tulali at Pascual.