2 kelot, todas sa hit-and-run

@Balitang Probinsiya | November 20, 2020

NORTH COTABATO—Dalawang lalaki ang namatay nang ma-hit-and-run ng trak ang kinalululanan nilang motorsiklo kamakalawa sa Bgy. Binoligan, Kidapawan City.

Kinilala ang mga biktima na sina Jahid Lu at Joedin Sendad, kapwa residente ng bayan ng Kabacan sa nasabing lalawigan.

Ayon sa imbestigasyon, mabilis ang takbo ng trak na minamaneho ng hindi pa nakikilalang driver kaya aksidenteng nabangga nito ang kasalubong na motorsiklo na kinalululanan ng dalawang biktima.

Dinala ng mga saksi ang mga biktima sa ospital, pero kapwa sila idineklarang dead-on-arrival.

Nagpalabas na ng manhunt operation ang pulisya para madakip ang driver ng trak na nahaharap sa kasong reckless imprudence resulting to double homicide and damage to property.