17 miyembro ng Abu Sayyaf, sumuko
Feb 8, 2022
1 min read
@Balitang Probinsiya | February 08, 2022
SULU–Labingpitong miyembro ng Abu Sayyaf Group (ASG) ang sumuko sa pamahalaan kamakalawa sa Pansul, Patikul.
Para sa kanilang seguridad ay hindi na pinangalanan ng mga awtoridad ang mga sumukong terorista na pawang miyembro ng ASG na nakabase sa nasabing lalawigan.
Nabatid na isinuko rin sa mga awtoridad ng mga terorista ang mga dala nilang mga armas at pampasabog.
Sinabi ng mga sumukong ASG na nais na nilang magbagong-buhay kaya nagbalik-loob na sila sa gobyerno.
Isinasailalim pa sa taktikal na interogasyon ang mga sumukong terorista upang matiyak na bukal sa kanilang kalooban ang pagbabalik-loob sa pamahalaan.
Comments