Vendor tinodas ng mga armado

@Balitang Probinsiya | August 10, 2022

MAGUINDANAO—Isang vendor ang namatay nang pagbabarilin ng mga hindi kilalang armadong lalaki kamakalawa sa Bgy. Pinguiaman, Datu Odin Sinsuat.

Kinilala ng pulisya ang biktimang nagtamo ng mga tama ng bala sa katawan na si Allan Mohammad, nasa hustong gulang at residente ng Cotabato City.

Ayon sa ulat, habang naglalako ng kanyang mga panindang kitchen wares si Mohammad sa nasabing barangay nang biglang sumulpot ang mga suspek at agad pinagbabaril ang biktima.

Nabatid na mabilis na tumakas ang suspek nang matiyak na patay na ang biktima.

Iniimbestigahan na ng pulisya ang motibo ng suspek sa pamamaslang kay Mohammad.