Tanod na rapist arestado

@Balitang Probinsiya | July 25, 2022

CEBU—Isang barangay tanod na gumahasa sa isang dalaga ang naaresto ng pulisya kamakalawa sa Bgy. Labogon, Mandaue City.

Kinilala ang suspek na si Diosdado Gesta, 56-anyos at nakatira sa nabanggit na barangay.

Ayon sa biktimang itinago sa pangalang “Lyka”, 18-anyos ay nagtungo siya sa barangay hall para ireklamo ng pananakit ang kanyang live-in partner at ang ginawa ni Gesta ay sinabihan ang dalaga na sasamahan niya ito sa ospital para magpa-medical.

Sinabi ni “Lyka”, na sa halip sa ospital ay sa lodge-in siya dinala ng suspek at dito siya ginahasa.

Matapos ang panggagahasa ay pinagbantaan ni Gesta si “Lyka”, na huwag magsusumbong sa pulisya, pero pagkalabas ng lodge-in ay agad nagtungo sa police station ang biktima at inireklamo ang tanod kaya agad nadakip ang suspek.