Rider patay, backrider sugatan sa waiting shed

@Balitang Probinsiya | August 12, 2022

ALBAY—Isang rider ang namatay at sugatan naman ang kasama nitong backrider nang aksidenteng bumangga sa waiting shed ang kinalululanan nilang motorsiklo kamakalawa sa Marayag, Libon.

Ang nasawi ay kinilala ng pulisya na si Santiago Herrera, 21-anyos, samantalang ang sugatan ay si Francis Rivera, 20-anyos, kapwa residente sa nabanggit na bayan.

Ayon sa ulat, nawalan umano ng kontrol sa pagmamaneho ng motorsiklo si Herrera habang kaangkas si Rivera kaya bumangga sila sa waiting shed.

Nabatid na nagtamo ng malaking pinsala sa ulo at katawan ang mga biktima.

Dinala ng mga saksi ang dalawang biktima sa ospital, pero idineklarang dead-on-arrival sa pagamutan si Herrera.