Rapist ng Aklan, nasakote sa Palawan

@Balitang Probinsiya | September 13, 2022

PALAWAN—Isang wanted na rapist sa Aklan ang naaresto ng pulisya kamakalawa sa kanyang hideout sa bayan ng Cuyo.

Ang suspek ay kinilala ng pulisya na si Jon Lester Gallardo, nasa hustong gulang at pansamantalang nakatira sa naturang bayan.

Napag-alamang dinakip ng pulisya ang suspek sa bisa ng warrant of arrest na inisyu ng korte kaugnay sa kinasasangkutan nitong kasong rape sa Batan, Aklan.

Ayon sa ulat, may nagbigay-impormasyon sa pinagtataguan ng rapist kaya agad rumesponde ang pulisya at dinakip ang suspek sa nasabing lugar.

Hindi naman nanlaban ang suspek at ngayon ay nakapiit na siya sa detention cell ng himpilan ng pulisya.