Parak at holdaper patay sa shootout

@Balitang Probinsiya | May 28, 2022

DAVAO DE ORO – Isang pulis at isang holdaper ang namatay sa naganap na engkuwentro kamakalawa sa Bgy. Magsaysay, Nabunturan sa lalawigang ito.

Ang nasawing pulis ay si P/SSgt. Erill Millana, nakatalaga sa Montevista Police Station, samantalang hindi pa nakikilala ang napatay na holdaper.

Ayon sa ulat, rumesponde si Millana at isang kasamahan nitong pulis sa report na may nagaganap na holdapan sa nasabing barangay.

Nabatid na agad pinagbabaril ng mga holdaper ang mga pulis kaya tinamaan ng bala sa katawan si Millana, pero nakaganti pa ito ng putok kaya napatay ang isang holdaper.

Kaagad dinala ng mga residente si Millana sa ospital, pero idineklara itong dead-on-arrival, samantalang pinaghahanap pa ng pulisya ang mga nakatakas na holdaper.