Negosyante patay, anak sugatan sa ambush

@Balitang Probinsiya | September 6, 2022

NUEVA ECIJA—Isang babaeng negosyante ang namatay at sugatan naman ang anak nito sa isinagawang ambush ng isang hindi kilalang salarin kamakalawa sa Bgy. San Nicolas, Gapan City.

Kinilala ng pulisya ang nasawi na nagtamo ng mga tama ng bala sa katawan na si Lilia Cabiedes, 47-anyos, samantalang ang anak niyang tinamaan din ng bala sa katawan ay nakilalang si Mark, 25-anyos, kapwa nakatira sa Bgy. Poblacion, San Isidro sa nasabing lalawigan.

Ayon sa ulat, lulan ng isang kotse ang mag-ina nang sumulpot ang suspek na nakasakay sa isang motorsiklo at agad pinagbabaril ang mga biktima.

Nabatid na matapos ang pamamaril ay tumakas ang suspek, samantalang dinala ng mga saksi ang mag-ina sa ospital, pero idineklarang dead-on-arrival si Lilia.

Nagpalabas na ng manhunt operation ang pulisya para madakip ang salarin.