Negosyante niratrat ng mga armado

@Balitang Probinsiya | August 1, 2022

NORTH COTABATO—Patay ang 37-anyos na negosyante nang pagbabarilin at tadtarin ng bala ng mga hindi kilalang armadong lalaki kamakalawa sa Bgy. Langayen, Pikit.

Kinilala ng pulisya ang biktimang nagtamo ng mga tama ng bala sa katawan na si Jay-ar Mamites, nakatira sa Bgy. Dualing, Aleosan sa naturang lalawigan.

Ayon sa ulat, habang minamaneho ni Mamites ang kanyang sasakyang top-down na may kargang tig-isang baka at kambing na kanyang binili sa nasabing bayan nang biglang sumulpot ang mga suspek at agad pinagbabaril ang biktima.

Nabatid na mabilis na tumakas ang suspek nang matiyak na patay na ang biktima.

Iniimbestigahan na ng pulisya ang motibo ng suspek sa pamamaslang kay Mamites.