Negosyante, niratrat ng armado

@Balitang Probinsiya | June 30, 2022

NORTH COTABATO—Patay ang 57-anyos na negosyante nang pagbabarilin at tadtarin ng bala ng hindi kilalang armadong lalaki kamakalawa sa Bgy. Takepan, Pikit.

Kinilala ng pulisya ang biktimang nagtamo ng mga tama ng bala sa katawan na si Conrado Gutierrez, nakatira sa naturang barangay.

Ayon sa ulat, pababa sa motorsiklo si Gutierrez nang biglang sumulpot ang suspek na armado ng armalite rifle at agad pinagbabaril ang biktima.

Nabatid na mabilis na tumakas ang suspek nang matiyak na patay na ang biktima.

Iniimbestigahan na ng pulisya ang motibo ng suspek sa pamamaslang sa biktima.