Mag-utol na NPA, sumurender

@Balitang Probinsiya | August 7, 2020

NUEVA VIZCAYA — Sumuko ang magkapatid na miyembro ng New People’s Army (NPA) kamakalawa sa pulisya sa Bayombong.

Para sa kanilang seguridad, kinilala lang ang magkapatid na sumuko sa mga alyas na Ka Cain at Ka Abel, kapwa NPA na nakabase sa nasabing lalawigan.

Ayon sa ulat, isinuko rin ng magkapatid na rebelde ang mga dala nilang iba’t ibang uri ng armas, mga bala at subersibong dokumento sa Police Provincial Mobile Force Company.

Sinabi ng magkapatid na nais na nilang magbagong-buhay na kapiling ang kanilang pamilya kaya nagpasya silang sumuko sa pamahalaan.

Isinasailalim na sa taktikal na interogasyon ang magkapatid na NPA para matiyak na bukal sa loob nila ang pagbabalik-loob sa gobyerno.