Kumander ng BIFF at 7 pa, sumuko

@Balitang Probinsiya | July 29, 2020

MAGUINDANAO—Isang kumander ng Bangsamoro Islamic Freedom Fighter (BIFF) at pitong tauhan nito ang sumuko sa pamahalaan kamakalawa sa bayan ng Datu Saudi Ampatuan.

Ang mga sumuko ay pinangunahan ni Kumander Ibrahim Guno ng BIFF na nakabase sa nabanggit na lalawigan.

Ayon sa ulat, isinuko rin ng grupo ni Kumander Guno ang mga dala nilang iba’t ibang uri ng armas, mga bala at pampasabog sa 57th Infantry Battalion ng Philippine Army (PA).

Sinabi ni Kumander Guno na nais na nilang magbagong-buhay na kapiling ang kanilang mga pamilya kaya nagpasya silang sumuko sa pamahalaan.

Isinasailalim na sa taktikal na interogasyon ang mga sumukong terorista para matiyak na bukal sa loob nila ang pagbabalik-loob sa gobyerno.