Ama todas, anak sugatan sa pamamaril

@Balitang Probinsiya | July 19, 2022

AKLAN—Patay ang ama habang sugatan naman ang anak nito nang pagbabarilin ng isa nilang kapitbahay kamakalawa sa Bgy. Bigaa, Malinao.

Ang nasawi ay kinilalang si Jimmy Gregorio, 58-anyos, samantalang ang sugatan ay ang anak nito na si Lester, 17-anyos, kapwa residente sa nabanggit na barangay.

Nakilala naman ang suspek na si Ronnie Naig, nasa hustong gulang, na tumakas matapos ang pamamaril.

Ayon sa ulat, dati na umanong may alitan ang pamilyang Gregorio at Naig, at nang makita ng suspek ang mag-amang biktima ay agad silang pinagbabaril ng salarin.

Kaagad dinala ng mga saksi ang mag-amang biktima sa ospital, pero idineklarang dead-on-arrival si Jimmy.