5 Wanted na arsonista nasakote

@Balitang Probinsiya | May 28, 2022

ISABELA – Limang most wanted na arsonista ang nadakip ng mga awtoridad kamakalawa sa Bgy. Matusalem, Roxas sa lalawigang ito.

Hindi na muna pinangalanan ang mga suspek habang iniimbestigahan sila ng mga awtoridad.

Ayon sa ulat, dinakip ng pulisya ang mga suspek sa bisa ng warrant of arrest na inisyu ng korte kaugnay sa kinasasangkutan nilang kasong arson sa lalawigan.

Napag-alaman na ang mga suspek ang itinuturo ng mga saksi na sumunog sa taniman ng mais sa nabanggit na bayan.

Nabatid na may nagbigay impormasyon sa mga awtoridad sa kinaroroonan ng limang arsonista kaya agad rumesponde ang mga operatiba at inaresto ang mga suspek.