Katotohanan at katarungan na siyang magbibigay sa kanila ng katahimikan... MGA HINAGPIS NA NARARAMDA

PAO CHIEF PERSIDA ACOSTA / DAING MULA SA HUKAY HUSTISYA

ISANDAAN at apat (104), sana ang bilang na ito ay para sa mga na­walang tupa na nahanap na dahil tiyak na may tuwa sa dibdib ang muling makita sila at may kati­yakan na sila ay ligtas sa anumang panganib na nakaamba. Ngunit, sa kasamaang-palad, ang numerong ito ay kuma­katawan sa mga biktima ng nakapipinsalang ba­kuna na sumailalim sa forensic examination ng Public Attorney’s Office Forensic Team (PAOFT). Gayunman, kahit sa ganitong paraan man lamang ay maipakita na­min sa kanila ang aming pagmamalasakit sa pa­mamagitan ng aming mahusay at buong pag-iingat sa pagsusuri sa kanilang mga labi. At kumakapit pa rin kami sa paniniwalang maka­kamit natin ang mga bagay na ngayon ay ipi­naglalaban para sa ka­nila — katotohanan at kataru­ngan na siyang magbibigay sa kanila ng katahimikan.

Si Krisha Agonia, ang pang-isandaan at apat (104) sa nasabing mga biktima na nabigyan ng PAOFT ng naturang ser­bisyo. Siya ay batang ba­bae, labing-apat (14) na taong gulang na may pa­ngarap na maging titser upang maiahon sa kahi­rapan ang kanyang mga magulang na na­ninirahan sa bulu­bundukin ng Quezon Province.

Lalong tumindi ang panaghoy at pag­tangis na walang pa­tid. Ang bintang ng mga nasasakdal ay “drama lang ‘yan,” mga katagang nanu­nuya pa. Paano magi­ging drama ang tunay na buhay na batbat ng pagdurusa at pig­hati sa puso ng ina at ama na biniyayaan ng Diyos ng supling na ma­mahalin, habambuhay at hanggang kamatayan?

Sukdulan ang sama ng ilan na sinisisi pa ang mga magulang. Anila: “Pina­ba­yaan n’yo ‘yan, kaya nag­kasakit”, “umaarte lang ang anak ninyo”, “ma­baba pa ang lagnat, kaya umuwi muna kayo”, “malayo sa Dengvaxia ‘yan at nakatulong pa ‘yan sa kanya.”

Ang mga pangungu­sap na ito ay mistulang karayom na itinutusok din na parang herenggilya sa puso at damdamin ng mga magulang at ng ka­nilang mga anak na nasa bi­ngit ng kamatayan. Kay­­saklap na hanggang sa huling hibla ng buhay at hininga, ang nasasam­bit na lamang ng biktima ay — “Nanay, tatay, basta po tandaan ninyo na mahal na mahal ko po kayo.”

Mula sa bayan ng Ca­lauag, Quezon, may mga magulang na pumunta sa PAO upang ipa-autopsy ang kanilang mga anak na na­turukan din ng bakuna. Handa na ang lahat — permiso at iba pa. Subalit, malungkot ang mga tu­mutulong dahil nang ga­bing ‘yun, bago magsa­gawa ng autopsy na sang-ayon sa kautusan ng De­partment of Justice (DOJ), may mga grupo na inili­kas ang mga magulang at kaanak upang hindi na ma­abutan ng mga tumu­tulong na nakaayon sa batas upang mabigyan ng hustisya ang mga biktima na wa­lang kalaban-laban sa bag­sik at kamandag ng na­itarak sa kanilang mu­rang katawan.

“Bakit sukdulan ang sama ng may kagaga­wan nito? Matinding co­ver-up, pagtatago ng krimen, pag­tatakip para hindi dumami ang bi­lang ng na­imbestigahan ng PAO”, ang sigaw ng ma­gu­lang na ngayon ay la­bas-ma­sok sa pagamutan dahil pinadodoktor ang mahal na panganay na anak.

“Ang bagal ng hus­tisya!” ang hinagpis ng doktor na eksperto sa in­ternal medi­cine. “Pa­anong hindi babagal, na­­kaupo pa sa kapang­ya­­­ri­han ang mga idine­de­­manda at nagagawa pa ang gusto nila?” ang sa­got naman ng isa. “May letter na ang VACC na ma­suspinde sila, pero hang­gang ngayon ay may po­wer pa sila,” ang pakli ni Dr. Francisco S. Cruz, na isang public health vacci­nation expert ng VACC.

Gaano karaming luha at buhay kaya ang aagos at malalagas sa tangkay ng panahon bago magka­roon ng tunay na hus­tisya? Ako ay nananala­ngin na sana sa karagatan ng luha ay walang malu­nod at mawalan ng pag-asa at ang tangkay ng pa­nahon ay maging saksi sa paggawad ng pinaka­hi­hin­tay na hustisya bi­lang bi­yaya sa mga bik­tima at pamilya nilang pi­nahira­pan.

“Pinag-eksperimen­tuhan ninyo ang mga anak namin, ginawa nin­yong pa­rang hayop, wala ka­yong awa!”, ito ang pa­ulit-ulit na isinasambit ng mga magulang ng isanda­an at apat (104) na nama­tay.

Mula sa madilim na hukay, ang mga ito ay tila mga mata na umiiyak at sumisigaw ng “hus­tisya”. Mga kaluluwa si­lang dati ay may buhay na bumi­gay ang resisten­siya para labanan sana ang kaman­dag ng mik­rob­yo na itinu­rok sa ka­nila. Gayunman, puspos ng kagitingan ang kasay­sayan ng kani­lang pakiki­paglaban.

(Itutuloy)