2 kagawad niratrat, 1 patay

@Balitang Probinsiya | July 6, 2020

LA UNION—Isa sa dalawang barangay kagawad ang namatay nang barilin ng mga hindi kilalang armadong lalaki kamakalawa sa Bgy. Camilo Osias, Balaoan.

Ang nasawi na nagtamo ng mga tama ng bala sa katawan ay si Kagawad Jovito Lopez, samantalang ang sugatan na tinamaan sa kanang paa ay si Kagawad Oliver Ostrea, kapwa residente ng Bgy. Nalasin sa nasabing bayan.

Ayon sa ulat, pauwi na sina Lopez at Ostrea mula sa pakikipaglamay sa burol ng isa nilang yumaong kababayan nang sumulpot ang mga suspek at agad pinagbabaril ang dalawang biktima.

Kaagad tumakas ang mga suspek matapos ang pamamaril at nang dalhin ng mga saksi sa ospital ang dalawang biktima ay idineklarang dead-on-arrival si Lopez.

Iniimbestigahan na ng pulisya ang motibo ng mga suspek sa pamamaril sa dalawang biktima.