Carl-Kulot killings, nabigyang-hustisya pagkatapos ng 5 yrs.

ni Korina Sanchez - @Isyung 'K' | November 26, 2022

Sa wakas, pagkalipas nang limang taon ay nahatulan na ang pulis na nanghuli, nag-torture at pumatay kay Carl Angelo Arnaiz noong 2017. Panahon nang madugong kampanya ni dating Pangulong Rodrigo Duterte kontra ilegal na droga naganap ang krimen. Si PO1 Jeffrey Perez ay nahatulang may sala para sa krimen ng torture, pagtanim ng ebidensya at pagpatay kay Arnaiz, habang nahatulan din siya ng krimen ng torture at pagpatay kay Reynaldo “Kulot” de Guzman. Pagkalipas ng isang buwan ay natagpuan ang katawan ni De Guzman na may 25 saksak sa katawan sa Gapan, Nueva Ecija.

Habambuhay na pagkakakulong ang parusa nito. Inutusan din siya ng korte na bayaran ng tig-P1-M ang pamilya nina Arnaiz at De Guzman. Samantala, ang kasamang pulis naman ni Perez na si PO1 Ricky Arquilita ay mahahatulan din sana pero namatay siya bago pa nailabas ang desisyon.

Ayon sa Public Attorneys’ Office na siyang naging abogado ng pamilya nila Arnaiz at De Guzman, nahirapan sila sa kaso dahil tila ayaw ng PNP makipagtulungan. Patunay na may fraternity ang Philippine National Police (PNP).

Naganap ito noong kasagsagan ng Oplan-Tokhang, kung saan halos lahat ng napatay ng PNP kaugnay sa ilegal na droga ay “nanlaban”. Bukod sa kaso nina Perez at Arquilita, may kaso rin laban sa tatlong pulis-Caloocan na suspek sa pagpatay kay Kian delos Santos. Sila ang nahatulang may sala para sa pagpatay kay Delos Santos pero nakalusot sa pagtanim ng ebidensya. Gayunman, 40-years na pagkakakulong ang parusa sa mga ito. Pero sa tingin ko’y mas deserve nila ang parusang pagkakakulong ng panghambuhay.

Pero naniniwala ba kayo na ang dalawang kaso ng paghuli, pagtanim ng ebidensya at pagpatay lamang ang naganap sa Oplan-Tokhang noong panahon ni Duterte? Libu-libo ang napatay noon. May testigo at CCTV ang dalawang kaso kaya sila nahuli, pero siguradong marami pang kaso ang katulad nito na sadyang wala lang CCTV footage o testigo na ayaw lumabas dahil sa takot.

At ano kaya ang dahilan kung bakit kinailangang patayin silang tatlo? Hindi naman sila banta sa lipunan, lalo na sa mga pulis. Napatunayang gawa-gawa lamang ang salaysay ng mga pulis.

Nais lang ba nilang malagay sa balita na nakapatay sila ng mga sangkot sa ilegal na droga, tulad ng ibang pulis na nakapatay din ng mga “nanlaban”? Nais ba nilang magpalakas o magpakitang-gilas kay Duterte? May tagong pabuya ba para sa bawat napapatay?

Nasiwalat nga sa dalawang kaso ang walang dahilang paghuli, pag-torture, pagtanim ng ebidensya at pagpatay sa inosenteng mamamayan. Magpasalamat tayo at nahatulan ang masasamang pulis—pero sila lang ba ang sangkot sa ganitong gawain?

Uso na naman ang Dengue, isyu na naman ang Dengvaxia

ni Korina Sanchez - @Isyung 'K' | July 23, 2022

Ayon sa pagsusuring isinagawa ng Social Weather Stations, 83% ng mga Pilipino ay umaasang tapos na ang masasamang araw hinggil sa COVID-19. Tulad sa ibang bansa, ang saloobin ay “Nand’yan na ‘yan, kaya tanggapin na lang”. Pero marami ang nangangambang makapitan ng COVID at magkasakit, kaya marami pa rin ang sumusunod sa pagsusuot ng face mask kapag lumalabas ng bahay.

Hindi mahirap pagsabihan ang mga Pinoy, hindi tulad sa mga Amerikano na ang tingin sa pagsusuot ng face mask ay paglabag sa kanilang kalayaan. Kailangang itulak ang pagbabakuna pati ang mga booster. Mabuti naman at marami na ang nagtitiwala sa bakuna kontra COVID. Tandaan, marahil ay hindi pa tapos lumikha ng bagong variants ang nasabing virus.

Sa kabila nito, dumarami ang mga kaso ng dengue sa bansa. Nagtala ng 65,190 kaso ngayong 2022. Ayon sa Department of Health, mas mataas ito ng 83% kumpara noong nakaraang taon, kung saan 274 ang namatay. Hindi dapat dinidedma ang bilang na ‘yan. Hindi biro ang sakit na ito, na dulot ng kagat ng lamok, baka dahil sa pag-aalala sa COVID, nakalimutan natin ang dengue.

Kaugnay nito, kapag napag-uusapan ang ‘dengue’, malamang na nababanggit ang Dengvaxia, tulad ngayon, kaka-search lang ulit natin sa internet. Tanging Pilipinas lamang ang nagkaroon ng problema o kontrobersya sa nasabing bakuna — wala nang iba.

Aprub na ang Dengvaxia sa America at Europe, pati sa mga bansa sa South America at maging sa ilang bansa sa Asya, tulad ng Singapore. Ayon sa isang eksperto sa Infectious Diseases, epektibo ang Dengvaxia kung wasto ang paggamit, tulad ng mga bakuna laban sa COVID, hindi garantisadong hindi magkakasakit pero matitiyak na hindi seryoso o mapanganib ang kondisyon ng pasyenteng nabakunahan. Ayon pa sa ulat, upang maging epektibo, kailangang nagkaroon na ng dengue noon upang tumalab ang nasabing bakuna. Ito ang hindi maipaliwanag agad ng Sanofi Pasteur, kaya ginatungan ang isyu.

Sayang nga’t napulitika nang husto ang Dengvaxia, baka nabigyan ng sapat ng proteksyon at hindi namatay ang mga biktima. Samantala, may mga tumututol pa rin sa pagbalik ng bakuna sa bansa. Siyempre, hindi nila babaguhin ang kanilang katayuan sa isyu. Pero kung titingnan sa mga mata ng dalubhasa o eksperto, epektibo ang Dengvaxia. Tanging bakuna lang ang maaaring ilaban sa virus. Kaya kung may kulang pa sa bakuna, lalo na ang mga bata, magpabakuna na sa lalong madaling panahon. Kasama riyan ang bakuna kontra tigdas.

Gayundin, dumami ang kaso ng tigdas dahil marami ang nangambang magpabakuna dahil sa kontrobersya ng Dengvaxia. Sana, muling pag-aralan ang pagpasok ng Dengvaxia sa bansa, na sa ngayon ay ‘yan lang ang tanging bakuna laban sa dengue. Kung ginagamit ito ng ibang bansa na walang kontrobersya, bakit hindi rin nating gamitin sa ating bansa? Pero siyempre, nang may sapat na kaalaman.

Kampante na naman ang mga Pinoy... Lumulobo na naman ang kaso ng COVID

ni Korina Sanchez - @Isyung 'K' | June 30, 2022

Nagtala ng 848 bagong kaso ng COVID-19 noong Linggo, kung saan ito ang pinakamataas na data mula noong Marso, samantala nasa 11 naman ang namatay na base sa datos ng Department of Health (DOH).Pati umano ang mga doktor ay nagkakasakit na rin dahil marami na umano ang tumatanggap ng face-to-face consultation.

Ayon naman sa OCTA Research, tumaas ang positivity rate sa Metro Manila mula 3.9% ay naging 5.9% na. Ibig sabihin, dumarami ang positibo sa COVID. Hindi lang sa National Capital Region (NCR) tumataas ang positivity rate, kundi sa maraming lugar sa bansa. Pinakamataas sa lalawigan ng Rizal, kung saan tumaas ito ng 11.9% mula 6.3%. At lahat ito’y sa loob lang ng isang linggo.

Hindi natin masisisi ang katatapos na halalan kaya tumaas ang kaso at higit isang buwan na ‘yun. Sa tingin natin kaya patuloy ang pagtaas ng bilang ng kaso ng COVID-19 ay dahil mas nagiging kampante na ang mga tao. Wala nang pagdadalawang-isip na pumasok sa mga establisimyento kahit pa maraming tao, partikular sa mga kainan na kung makapagtanggal ng face mask ay ganun na lang.

Samantala, ayon sa DOH, posible pa umanong umabot sa mahigit 4, 000 kaso sa NCR kada araw sa gitna ng Hulyo dahil sa pagiging kampante na ng tao. May babala rin na maaaring ibalik ang NCR sa Alert Level 2. Hindi ito magiging maganda para sa lahat ng negosyo, na halos nagsisimula pa lang makabawi matapos ang mahigit dalawang taong paghihigpit dulot ng pandemya. Napakahirap na nga ng buhay, nakakalula pa ang presyo ng gasolina at diesel. Kahit ang mayayaman ay napapailing na lang kapag nagpapagasolina.

Hindi mapigilan ang paikut-ikot na paghigpit at pagluwag kung hindi rin tayo kikilos ng tama. Panatilihing isuot ang face mask kapag nasa pampublikong lugar. Hangga’t maaari’y umiwas sa maraming tao kasi hindi na nasusunod ang physical distancing. Gayundin, magdala ng mga hand sanitizer o alcohol. Sa atin dapat manggagaling ang solusyon, hindi ang panibagong problema.